DAVAO CITY- Patay ang usa ka lalaki human kining nakigpinusilay atol sa gipahigayong buy-bust operation sa kapulisan sa Sta. Ana Police Station bandang alas 5:30 kagabii sa Brgy. 23-C, Davao City.
Sa impormasyon sa otoridad, nailhan ang suspek nga si John Archie Araula alyas Archie, ulitawo, hamtong ang panuigon, residente sa Brgy. 76-A, Bucana ning syudad ug giilang Top 1 Station Level High Value Individual (HVI).
Nasayran subay sa imbestigasyon, positibong napalitan sa pulis nga nagtakubang buyer ang suspek og usa ka pakete sa shabu bugti sa kantidad nga P5,000.
Atol sa transaksyon, nakamatikod ang suspek nga pulis na diay ang ka-transaksyon niini rason nga gilayon kining mibunlot sa iyang .45 kalibre nga pistola ug gipabuto ngadto sa pulis nga swerte usab nga nakalikay.
Matud pa nga makadaghang higayon nga nagpabuto ang suspek ngadto sa nahisgutang police officer apan dali sab nga mi-responde ang back up niining si Police Corporal Lerin ug mibalos og pagpabuto ngadto sa suspek.
Dali sab nga gidala ang suspetsado sa ospital aron maluwas pa ang kinabuhi niini apan gideklara na kining patay sa attending physician.
Narekober sab sa crime scene ang usa ka unit sa caliber .45 nga adunay unod tulo ka bala, duha ka basyo sa bala nga gitouhang gikan sa cal. 9mm pistol ug duha ka basyo sa bala nga gikan sa .45 pistol .
Sa pikas bahin, narekober sab gikan sa patay’ng lawas ni alyas Archie ang usa ka Sling Bag nga adunay duha ka pakete sa shabu ug kwarta nga nagkantidad og P1,000.
Ang tanang nakumpiskang shabu gikan sa suspek ang adunay gimbug-aton nga 8.84 grams ug gibana-banaang street value nga P 123,760.
