DAVAO CITY – Nag-awhag karon ang usa ka espesyalista nga magpa-self examination alang sa sayo nga pagdetermina sa mga sintomas sa breast cancer.
Sa nahimong pakighinabi sa Bombo Radyo Davao ngadto kang Dr. Vanina Javier, usa ka Medical Oncologist, gikanayon niya nga maski kinsa, mapa-babaye o lalake, pwede magbaton ug breast cancer.
Duna sab mga natalang mga biktima sa maong sakit sa bata nga edad.
Kon masuta sa self-examination ang mga lusay o gagmang bukol, mamahimong idangop kini sa mga espesyalista alang sa early prevention niini.
Nasayran nga ang pangidaron, radiation exposure, obesity, family history ug dili maayong lifestyle ang ginatudlong hinungdan sa breast cancer.
Apan, posibleng mapakunsad ang mga risgo niini pinaagi sa pagbaton ug healthy lifestyle, pag-ehersiyo, ug pagpa-check up sa doktor.
Kasamtangang gihinumdom karon ang Breast Cancer Awareness Month karung bulan sa Oktubre.
Ang breast cancer, usa ka makakuyaw nga sakit nga tinubdan ang sobra nga pagtubo sa mga cells sa suso.
Sumala pa sa Department of Health, breast cancer ang ikatulo sa nag-unang makamatay nga mga matang sa kanser diri sa nasud. Pilipinas sab ang nagbaton ug pinakataas nga insidente sa breast cancer sa tibuok Southeast Asia.
VIA || Bombo LJ Florendo
