DAVAO CITY – Nagpakita ug suporta ang mga punong barangay sa Island Garden City of Samal alang sa pagatukurong Samal Island-Davao City Connector Project.
Gipangunahan ang panagpulong sa National Economic and Development Authority (NEDA) director general Secretary Arsenio Balisacan, Davao del Norte Gov. Edwin Jubahib, IGACOS LGU ug DPWH nga gitambungan sa 43 out of 46 ka mga barangay captains sa syudad niadtong Sabado, Oktubre 8.
Gikabutyag sa mga kapitan nga makatabang ang maong proyekto alang sa turismo, pagpadani sa mga mamumuhunan sa syudad, ug paglambo sa mga barangay nga daw makabenipisyo sa maong tulay.
Gikagul-an sab sa mga kapitan ang nahimong baruganan sa pamilyang Rodriguez-Lucas sa maong proyekto gumikan sa posibleng pagkadaot sa mga kadagatan sa Samal Island apan matud pa, adunay pamaagi ang gobyerno aron matubag kini.
Una nang gikanayon ni Mayor Al David Uy nga gilauman ang maong proyekto sa kapin syento baynte libo ka mga lumulupyo sa Samal ug dos milyones ka mga Dabawenyos.
Sigun pa ni Secretary Balisacan, prayoridad karon sa kasamtangang administrasyon ni Pangulong Ferdinand Marcos Jr. ang pagpanukad sa pinakadakong proyekto sa Mindanao ug naglaum kini nga maresolba ang mga kakulian atol sa pagtukod sa maong tulay.
via || Bombo LJ Florendo
