DAVAO CITY – Gisugyot ni kanhi Department of Agriculture secretary ug food security adviser Manny Piñol nga palapdan ang Food Terminal Incorporated project taliwala sa pagsaka sa mga presyo sa nag-unang palaliton.
Gikanayon ni Piñol nga kinahanglang pagatutukan sa kasamtangang administrasyon ang marketing system sa nasud diin nanguna ang mga pribadong kumpanya sa paghatud ug mga produkto diin gagmay lang ang mamahimong kita nga makuha sa mga mag-uuma.
Sigun pa sa kanhi opisyal nga makatabang ang pagpalapad sa Food Terminal alang sa mas dali nga pag-abut sa mga mag-uuma sa lagyung dapit na mahatod ang mga produkto sa merkado ug mapakunsad pa ang presyo niini.
Gihatagan ug diin ni Piñol nga dili dapat magdepenede ang gobyerno sa importation gikan sa ubang nasud nga mas mag-tinubdan pa sa paggamay sa suplay ug pagmahal sa mga nag-unang palaliton.
Saglit, kaya sa atong mag-uuma ang mag-produce apan angayng hatagan sila ug haum nga presyo sa iyang hinaguang produkto.
Sa pikas bahin, gikatakdang ablihan karung Oktubre 18 ang Davao Food Terminal Complex nga nahimutang sa Brgy. Daliao, Toril, ning dakbayan.
Sigun ni City Agriculturist’s Office Head Edgardo Haspe, kumpleto ang mga pasilidad sa maong bagsakan nga magadawat ug mga produkto gikan sa pipila ka bahin sa dakbayan ug sa mga kasikbit nga mga lugar.
Baynte-kwatro oras ang operasyon sa maong bagsakan nga gigahinan ug P70 million sa Department of Agriculture 11.
via || Bombo LJ Florendo
