DAVAO CITY- Gikatakdang abrihan karong Oktubre 18 ang Davao Food Terminal Complex (DFTC) nga nahimutang sa Barangay Daliao, Toril ning syudad sa Davao.
Subay kini sa anunsyo sa City Agriculturist’s Office (CAgrO), diin ang nasangpit nga proyekto ang gigahinan og mikabat sa P70-Million nga pondo sa Department of Agriculture Davao Region (DA-11).
Dugang pa niini, magsilbi sab ang DFTC nga opisyal nga wholesale trading facility sa syudad alang sa tanang prutas ug gulay diin abli kini 24/7.
Gikanayon pa ni CAgrO Head Edgardo Haspe nga ang maong cold storage facility ang adunay walo ka refrigerated containers ug upat niini ang gamiton sa partial operations sa pasilidad ug igo lamang kini nga makaakomodar sa bulto nga mga produkto sa syudad ingon man sa mga kasikbit nga mga rehiyon.
Sa higayon nga hingpit nang maabrihan, direkta na nga ihatod sa DFTC ang tanang prutas ug gulay gikan sa mga kasikbit nga rehiyon ayha kini makaabot sa retail markets sa Davao.
Gani, sulod sa usa ka tuig nga pag operate sa DFTC, mamahimo pa gihapong makahatod ang mga farmers sa ilang abot sa mga pampublikong palengke ning dakbayan sama sa Agdao, Bankerohan, Buhangin, Piapi, Matina Crossing, Calinan, Toril, Sasa, ug Tibungco.
