DAVAO CITY- Gikumpirma sa Bunawan Police Station nga personahe nila si Police Master Sgt. Christopher Ararao, 45 anyos, kinsa nalambigit sa mga nanulis sa usa ka fish dealer sa General Santos City. Tungod sa nahitabo, hinanaling gi-relieve sa pwesto ang station commander sa Bunawan Police Station nga si Police Maj. Milan Naz.
Sa pagkakaron, nagsilbi isip OIC sa Bunawan Police ang Deputy Station Commander niini nga si PLt. Dante Espejon.
Nasayran nga lima pa ka bulan nga na-assign sa warrant section Bunawan PNP si Ararao kinsa nagsugod sa iyang pagka pulis sukad kaniadtong tuig 2004 o 18 ka tuig na kining anaa sa serbisyo.
Gikanayon ni DCPO spokesperson Police Major Catherine Dela Rey nga nagpadala na ang DCPO og usa ka team sa GenSan aron mohimo og dugang imbestigasyon.
Sa karon, balhog na sa General Santos Police Station si Police Master Sergeant Christopher Ararao uban ang laing pang police nga si Police Chief Master Sergeant Renante B. Medina, 44 anyos, nadestino sa DCPO Foot Patrol & Bike Unit, ug ang mga sibilyan nga sila Edwin T. Salvador, 40 anyos, ug Winston Jay L. Ongco, 30 anyos.
Subay sa report, gisulod sa mga suspect ang balay sa usa ka negosyante og isda nga gikompirma nga mao si Jacky Failden nga residente sa Purok Ondok Gawan, Barangay San Jose sa General Santos City.
