DAVAO CITY- Gilayong gisikop sa mga sakop sa IGaCoS Police Station ang usa ka 19 anyos nga lalaki gumikan sa paghupot niini og pinaugang dahon sa Marijuana.
Dakpan ang nahisgutan sa gimuntar nga checkpoint sa kapulisan sa Purok- 1b, Brgy. Peñaplata, Samal District, IGaCoS. Giila ang dinakpan nga si alyas “Tubs”, 19 anyos, ulitawo, walay trabaho ug residente sa Brgy. Mambago B, Babak District.
Atol sa maong operasyon, nakumpiska gikan sa posisyon sa suspek ang duha ka sachet sa gidudahang pinaugang dahon sa marijuana nga adunay gimbug-aton nga 2 grams ug street value nga P1,000.
Paslak na karon sa prisohan ang dinakpan nga gikatakdang pasakaan og kasong paglapas sa RA 9165 o Comprehensive Dangerous Drugs Act of 2002.
Sa pikas bahin, gipanaad sa mga sakop sa IGaCoS Police Station nga pakusgan pa niini ang ilang anti-criminality operations aron mapugngan ang pagdaghan sa iligal nga druga sa Samal Island.
