DAVAO CITY- Malampusong napuhag ang usa ka drug den ingon man nakumpiska ang mukabat sa P220,000 nga kantidad sa iligal nga druga atol sa gipahigayong buy-bust operation sa mga sakop sa Philippine Drug Enforcement Agency (PDEA) Davao del Norte kaganihang alas 12:47 sa kadlawon sa Purok 5, Barangay Southern Davao, Panabo City probinsya sa Davao del Norte.
Naaresto ang target sa operasyon ug ang nanag-iya sa maong drug den nga si Jessie Bantoy alyas Badjie, 32 anyos, ulitawo ug residente sa nasangpit nga dapit human nga napalitan kini sa usa ka poseur buyer og anaa sa kapin kun kulang usa ka gramo nga iligal nga druga nga nagkantidad og P10,000.
Atol sa drug buy-bust operation, laing tulo ka mga indibidwal ang nasikop sab human maaktohing nagpahigayon og pot session.
Giila ang mga dinakpan nga sila Baby John Bantoy, Ceddy Daclan ug Cresencio Fuentes. Nakumpiska sab atol sa operasyon ang unom ka pakete sa gidudahang shabu nga adunay street value nga P210,000, mga drug paraphernalia ug ang buy-bust marked money.
Gikumpirma ni Director Aileen T. Lovitos, Regional Director sa PDEA Regional Office XI nga kasong paglapas sa Republic Act 9165 o Comprehensive Dangerous Drugs Act of 2002 ang atubangon sa mga dinakpan.
