DAVAO CITY- Gikatakdang pasidunggan sa lokal nga kagamhanan sa dakbayan sa Dabaw ang moabot sa 30 ka mga centenarians sa taliabot nga bulan sa Oktobre.
Hatagan sa syudad og plake ug cash incentives nga nagkantidad og P100,000 ang matag usa sa 30 ka mga na-validate nga mga centenarians sa Davao City karong Oktubre 3.
Gikanayon ni Davao City Social Welfare and Development Office Head Atty. Marlisa A. Gallo, kini ang kabahin sa pagpatuman sa City Ordinance No. 0727-21, Series of 2021, o ang kamanduan sa paghatag og pasidungog sa mga nag-edad na og usaka gatus dinhi sa dakbayan.
Gugang pa ni Gallo nga lahi ang madawat sa mga centenarians nga insentibo gikan sa DSWD ug lahi usab ang madawat niini nga insentibo gikan sa lokal nga kagamhanan hinungdan nga masulti niini nga usa ka dakong hagit alang sa mga katigulangan nga makaabot gayud og 100 years ug gumikan kay kinatibuk-ang 200,000 pesos na tanan ang madawat niini.
Aron mahimong kwalipikado, angayan nga ang awardee ang usaka Filipino Citizen nga miabot og 100 years old pataas, registered voter, ug kinahanglan nagpuyo sa dakbayan sa Dabaw sulod sa 3 ka sunod-sunod nga tuig.
Subay sa validated list, ang labing tigulang nga Dabawenyo ang nag-edad og 114 years old. Anaa sab sa 24 ka mga centenarians gikan sa 30 ang gilangkuban sa mga babaye.
Mamahimong mo-usbaw pa ang ihap sa mga awardees gumikan kay daghan pang mga centenarians ang na-validate ug nag-qualify alang sa cash grant.
