DAVAO CITY- Dakpan sa hiniusang puwersa sa Toril Police Station ug sa sakop sa 1105th Maneuver Company, Regional Mobile Force Battalion 11 ang usa ka construction worker human kining nalambigit sa pagpamaligya og iligal nga druga.
Ang dinakpan ang giilang si alyas “VEJETA”, 38 anyos, minyo, usa ka construction worker ug residente sa Brgy. Crossing Bayabas, Toril ning syudad.
Nasikop ang nahisgutan human kining napalitan sa undercover pulis og usa ka sachet sa shabu atol sa gipahigayong buy bust operation alas 7:47 kagabie.
Dungan sa nahisgutang transakyon, naabtan sab ang lain pang duha ka mga indibidwal nga si alyas “CHARITY”, 37 anyos, adunay ka-ipon, negosyante, ug si alyas “GREG”, 49 anyos, foreign national, adunay ka-ipon, negosyante, susamang residente sa Brgy. Bato, Toril ning syudad diin naaktuhan ang mga nahisgutan nga nagpahigayon og pot session gamit ang isa ka glass tube tooter ug usa ka lighter.
Largo prisohan ang mga dinakpan ug gikatakdang pasakaan og kasong paglapas sa R.A. 9165 o Comprehensive Dangerous Drug Act of 2002.
