DAVAO CITY – Namatikdan sa Davao City Covid-19 Task Force nga pipila lamang ka mga tawo ang nagsunod sa giaprubahang ordinansa nga magtugot sa boluntaryong pagsul-ob ug face mask sa tanang open areas sa dakbayan.
Gikanayon ni Task Force Spokesperson Dr. Michelle Schlosser, aduna gihapon kahadlok ang mga Dabawenyo nga mataptan ug COVID 19 ug posibleng naandan na sab sa kadaghanan nga mag-suot ug face mask kon mugawas sa mga kabalayan.
Kahinumdomang naselyohan ni Davao City Mayor Sebastian “Baste” Duterte ang Executive Order Number 43 usa ka simana na ang minglabay human gipagawas ni Pangulong Ferdinand Marcos Jr ang Executive Order Number 3 alang sa susamang kamandoan sa nasyonal nga panggamhanan.
Sa pikas bahin, nagpadayon gihapon ang programang Bakunahang Bayan Pinaslakas Special Vaccination hangtud Setyembre 30 gikan alas-otso sa buntag hangtud alas-tres sa hapon sa may Peoples’ Park.
Matud pa kang Vaccination Cluster Head Dr. Josephine Villafuerte, tumong sa maong programa nga madungagan ang ihap sa mga nagpabakuna batok COVID 19 ilabi na ang mga senior citzens ug mga persons with comordibilities.
Sigun sa datos, anaa sa 43.64% gikan sa target population ang nahatagan ug first dose, samtang nasa 9.35% pa lamang ang nagpa-booster na.
via || Bombo LJ Florendo
