DAVAO CITY- Anaa sa 3,136 ka mga benepisyaryo sa probinsya sa Davao Oriental ang nahatagan og tabang pinansyal sa Department of Social Welfare and Development Field Office XI pinaagi sa Livelihood Assistance Grant (LAG) niadtong Setyembre 5 hangtud 9 ning kasamtangang tuig.
Mukabat sa P32.7 million ang nagamit nga pondo sa buhatan alang sa maong programa. Tumong sa programa nga mahatagan og hinabang ang mga pamilyang anaa sa impormal nga sektor nga hilabihan gayud nga naapektuhan ang panginabuhian gumikan sa pagpatuman kaniadto sa community quarantine sa Probinsya sa Davao Oriental gumikan sa COVID-19 pandemic.
Gikan sa nagkadaiyang bahin sa probinsya ang nakadawat sa maong ayuda diin 679 ka mga benepisyaryo ang gikan sa Baganga, 200 sa Boston, 320 sa Caraga, 300 sa Cateel, 460 sa Manay, 527 sa Mati ug 650 ang gikan sa Tarragona, Davao Oriental.
Tumong sa Livelihood Assistance Grant nga matabangan ang mga napili ug kwalipikadong benepisyaryo nga mabalik ang ilang mga panginabuhian nga naapektuhan sa pandemya.
