DAVAO CITY – Giwagtang na sa Bureau of Fisheries and Aquatic Resources 11 ang temporaryong pagpasarado sa Davao Gulf alang sa mga mananagat o ang ginatawag nga closed season.
Sumala kang BFAR-XI regional director Raul Millana, nahimong epektibo ang pagpa-implemetar sa maong lakang aron mapadaghan ang mga isda sa kadagatan sa Davao.
Namatikdan sab nila ang pagdugang sa mga nakuhang isda gikan tuig 2020 hangtud 2021 ug dul-ang trentay singko porsyento kon itandi sa nakalabayng panahon.
Gipahigayon ug tulo ka bulan, sukad Hunyo hangtud Agosto, ang pagpahunong sa tanang aktibidad sa pagpamasol o pagpanakop ug isda aron mahatagan ug higayon ang mga isda nga makapadaghan alang sa pag-igo sa suplay niini.
Gipasalamatan sa buhatan ang mga LGUs, mga hingtundan ug ubang ahensya sa pagdumala sa ilang pakipag-alayon sa tinuig nga kalihukan.
Pagatutukan gihapon sa BFAR 11 ang tanang lihok sa pagpamasol sa tibuok rehiyon, sama sa dynamite fishing ug unregulated fishing.
via || Bombo LJ Florendo
