DAVAO CITY – Gidugok sa mga ginikanan lakip na ang mga estudyante ang City hall sa syudad sa Panabo sa tinguha nga mapasa ang ilang rekisitos ngadto sa DSWD aron maka-avail sa Educational Assistance.
Nanghinaut ang mga nahisgutan nga matabangan sila sa mayor sa maong syudad nga si Mayor Jose E. Relampagos. Mi-atubang sa mga ginikanan ug estudyante si Executive Assistant IV Josie Mary G. Relampagos alang sa pagpaminaw sa ilang mulo ug aron mahatagan og solusyon ang maong problema.
Subay niini, giklaro sab sa DSWD Panabo ang maong panghitabo diin matud pa, wala nila gidawat ang maong mga rekisitos gumikan lampas na kini sa adlaw nga pagsumite kaniadtong Agosto 27, 2022.
Makita sa panagway sa katawhan ang kaminghoy nga dili sila makapasa niini. Apan sa ulahing bahin, wala nagduha-duha mihangyo si EA IV Relampagos ngadto sa Panabo DSWD nga dawaton ang mga rekisitos ug paningkamotan nga mapasa kini sa Regional Office sa DSWD.
Gianunsyo usab sa DSWD Panabo nga kasamtangan gihunong usa nila ang pagdawat sa mga rekisitos ug hulaton lamang ang dugang pang detalye.
