DAVAO CITY – Personal nga gitambungan ug gipangunahan ni Vice President Inday Sara Duterte-Carpio ang wreath laying sa Tomb of the Unknown Soldier nga nahimutang sa Osmeña Park ning dakbayan sa Davao dungan sa pagsaulog sa 91st National Heroes’ Day.
Gawas sa Bise Presidente, anaa usab sa kasaulogan sila Davao City Vice Mayor Melchor Quitain Jr., hepe sa Task Force Davao nga si Lt. Col. Darren Comia ug Regional Director sa PRO XI nga si PBGen Benjamin Silo Jr. Sa pakighinabi kang Vice Mayor Quitain, gipasibaw niini ang iyang panawagan sa tanang dabawenyo nga mahinungdanon gayud nga dili kalimtan ang gihimong pagsakripisyo sa mga bayani sa nasud nga nakigbisog aron lamang ma-angkon sa nasud ang kagawasan nga padayong natagamtaman karon sa mga Pilipino.
Sa pikas bahin, gihatagan usab og gimbug-aton sa bise mayor nga karong panahona, dili lamang ang mga bayani nga anaa gipatik sa kasaysayan sa Pilipinas ang angayang hatagan og pag-ila apan lakip na sab ang mga modernong bayani sa atong panahon sama na lamang sa mga frontliners, doktor, sundalo, magtutudlo, OFWs ug uban pa nga padayong naningkamot alang sa kalamboan ug kaayohan sa nasud Pilipinas.
