DAVAO CITY – Giklaro sa Department of Social Welfare and Development – Davao Field Office nga duha lamang ka mga numero ang gigamit karon sa ilang buhatan alang sa pagtext sa mga aplikante sa educational assistance alang sa mga indigent students.
Sa pakighinabi sa Bombo Radyo Davao kang Michelle Franca, information officer sa DSWD XI, gibutyag niini ang “last 4 digits” sa duha ka mga cellphone number nga ilang gigamit diin mao ang : 6192 ug 5857.
Subay niini, gipa-igmat ug gipahimangnoan ni Franca ang publiko nga kung makadawat man og text apan dili gikan sa mga nasangpit nga numero, mamahimo na kining ikonsidera nga na scam ug angay gayud kining likayan.
Samtang, giklaro usab ni Franca nga ang nakadawat og educational assistance karong adlawa, mao kadtong mga aplikante nga mihulog sa ilang mga dokumento sa drop boxes sa DSWD kaniadtong miaging sabado.
Ang mga nahatagan karong adlawa mao ang mga back log niadtong nakalabay nga Sabado diin kahinumduman nga wala nahimong paspas ang transaksyon human gidagsa ug nagkagubot ang maong pagpang-apud-apod.
Dugang pa sa opisyal nga mulungtad pa og upat hangtud sa lima ka adlaw ang paaboton sa mga aplikante ayha makadawat og text messages.
Gipasabot sab niini nga bag-ohay lamang kini gipagula ug gisugdan nga estratehiya aron malikayan ang pagdagsa ingon man ang pag-tapok sa mga tao.
