DAVAO CITY – Gisumite na ni Highway Patrol Group (HPG) XI Regional Chief PCol. Jomaira Estrada ang ilang rekomendasyon kalabot sa nag-viral nga video sa social media influencer nga si Norme Garcia alang sa pagpahigayon og imbestigasyon sa gibuhat niining content video nga “Ligo Challenge” samtang nagsakay sa iyang motor.
Human nga mag-viral, gilayong miadto ang grupo sa Land Transportation Office sa balay sa maong social media influencer aron imbestigahan ang maong panghitabo.
Nasuta sa investigation team nga ang dalan nga gilatas sa vlogger samtang kini nagvideo shoot, usa ka dalan nga nahimong usa ka barangay road padulong sa laing barangay.
Matud pa sa otoridad nga delikado ang gihimo sa maong vlogger ug mamahimo kining maghatud og kadelikado dili lamang sa iyang kaugalingon apan sa uban usab. Gipahibalo sa awtoridad ngadto sa maong vlogger ang iyang nahimong violations o kalapasan ug mag-atubang kini og administratibong silot.
