DAVAO CITY – Nangayo ug suporta sa nasudnong panggamhanan ang Davao City Council ilabi na kang President Ferdinand Marcos Jr. alang sa pagahimoong labing unang waste-to-energy (WTE) facility sa dakbayan.
Sa resolusyon nga gihimo ni Davao City 1st District Councilor Tek Ocampo, nagkanayon nga ang nasud kinahanglan nga mopahimulos sa mga oportunidad nga gitanyag sa gobyerno sa Japan sa pagpahimulos sa teknikal ug pinansyal nga tabang sa pagpalambo sa malungtarong mga paagi sa pagdumala sa solid waste.
Una nang nagtanyag ang nasud Japan ug kapin dos bilyones pesos nga fund alang sa nahisgutang pasildad.
Tinubdan niini ang pagkapuno sa landfill sa Barangay New Carmen tunod sab sa nagkadaghang mga basura sa dakbayan nga sumala pa sa City Environment and Natural Resources Office kon CENRO, miabot na sa sais syentos hangtud syete sentos toneladang mga basura adlaw-adlaw.
Busa nanginahanglan na ug pag-adopt sa maong teknolohiya alang sa solid waste management. Nakapalit na sa ang City Government ug dyes ektaryas nga luna alang sa pagahimoong pasilidad.
Bisan pa man sa mga lakang sa pagpatuman niini, nagpadayag og takos nga dili pag-uyon ang environment group na Interfacing Development Interventions for Sustainability.
Sumala ni IDIS Executive Director Mark Peñalver, aduna pay mga mas malungtaron nga paagi sa pagsulbad sa problema sa solid waste.
Gisugyot ni Peñalver ang pagsiguro sa estrikto nga pagpatuman sa kasamtangan nga mga polisiya, lakip na ang paghimo sa mga materials recovery facilities ug segregation.
VIA || Bombo LJ Florendo
