DAVAO CITY – Anaa sa unse ka mga grupo nga musalmot sa duha ka kategorya sa Indak-Indak sa Kadayawan ang nakarehistro na. Kini mismo ang gikumpirma sa event organizer sa 37th Kadayawan Festival nga si Harold Quibete.
Ang mga contingents nga nakarehistro na alang sa open category ang gilangkuban sa Samal Island City College gikan sa Island Garden City of Samal; Palabuniyan Cultural Dance Ensemble gikan sa Municipality of Pikit North Cotabato ug Sidlakan Performing Ensemble sa Municipality of Malita sa Davao Occidental.
Muapil sab ang Sikat Performing Arts sa Sultan Kudarat; Youth Olmag Performing Arts Guild sa Kidapawan City ug ang defending champion nga Sindac Anib Performing Ensemble gikan sa Bislig City, Surigao del Sur alang sa pagdepensa sa ilang titulo nga ilang nadaugan kaniadtong 2019.
Alang sa school-based category, muapil ang defending champion nga mao ang Sta. Ana National High School Performing Arts Guild. Makigkompentensya sab ang Doña Carmen Denia National High School; Bernardo D. Carpio National High School Performing Ensemble ug Mabini National High School Apo Duwaling Dance Company.
Sa pikas bahin, ang Technical Education and Skills Development Authority sa Davao Region o TESDA-Davao musalmot usab sa labing unang higayon alang sa school-based category pinaagi sa tabang sa usa ka foreign choreographer gikan sa Nigeria. Sumala kang Quebete, gipasalig nila nga ang maong Nigerian choreographer gihatagan og briefing kalabot sa mga estilo sa maong street dance competition.
Ang Indak-Indak sa Kadayawan mahitabo karong Agosto 20 gikan alas 7:00 sa buntag hangtud alas 12:00 sa udto diin aduna kini tulo ka mga rota hangtud paingon sa grand showdown sa San Pedro Square.
Via || DANICA BAGIUO
