DAVAO CITY – Gipahibalo sa Davao City Water District nga aduna silay ipatuman nga pag-usbaw sa singil sa bayrunon sa tubig sa mga customer niini sa syudad.
Ipatuman ang dugang nga water rate sa Agosto 1 ning kasamtangang tuig.
Subay sa DCWD board resolution No. 22-170 nga gi-aprubahan sa Local Water Utilities Administration, anaa sa 30% o P178.50 ang ipahamtang nga usbaw sa unang 10 cubic meters alang sa mga residential connections.
Gipasabot sa DCWD nga kinahanglan nila magpatuman og dugang singil sa tubig gumikan usa sab sila sa apektado sa nagpadayong pagsaka sa presyo sa mga materyales, chemical, construction ilabi na ang presyo sa petrolyo.
Una nang gi-anunsyo sa DCWD nga aduna silay ipatuman nga 60% nga dugang sa water rate dinhi sa syudad diin bahinon kinii sa tulo ka hugna.
Ang una nga 30% ang ipatuman karong tuiga, samtang sa 2023 ipatuman ang 20% ug sa tuig 2024 ipatuman usab ang 10%.
Matud pa nga niadtong tuig 2020 pa unta ipatuman ang maong usbaw apan gumikan sa pandemya nga nasinatian sulod sa kapin duha ka tuig, wala usa kini gidayon.
