DAVAO CITY – Mukabat sa halos kinyentos ka mga indibidwal ang pugsanong gipahikling gumikan sa nahitabong pagbaha dinhi sa syudad sa Davao.
Gumikan niini, gilayong gipatuman sa Davao City Disaster Risk Reduction and Management Office ang force evacuation sa mga residente nga nanimuyo doul sa Matina ug Talomo River human nga miabot hangtud hawak ang tubig baha gumikan sa walay hunong nga pag-ulan.
Muabot sa 136 ka pamilya o 496 ka mga individuwal gikan sa upat ka mga areas sa Brgy. 74-A Matina Crossing ang gihikling gumikan sa kalit nga pagbaha kagabii.
Nasayran nga as of 12:26 AM, anaa sa Critical level na ang Talomo ug Matina River diin ang nahisgutang mga lugar nga doul niini ang ginakonsiderang flood prone areas.
Sa pikas bahin, nagpahinumdom karon ang PAG-ASA Davao City Field Office nga mag-igmat ug mahimong alerto ilabi na nga mamahimong kanunay ang masinatiang mga pagbundak sa ulan hatud sa Intertropical Convergence Zone (ITCZ).
Hinoon, walay natalang casualty ug na-angol sa nahitabong pagbaha.
