DAVAO CITY – Gibana-banaang mukabat sa 50,000 ka mga indibidwal ang laumang mutambong sa kasaulogan sa 37th Kadayawan Festival diri sa dakbayan sa Davao sa bulan sa Agosto.
Sumala kang Councilor Al Ryan Alejandre, chairperson sa committee on tourism sa 20th city Coucil , mas ubos pa kini kung itandi sa nakalabay nga selebrasyon diin wala pa nahitabo ang COVID-19 pandemic diin miabot sa 200,000 ang mga mibisita.
Kahinumduman nga karong tuiga, subling ipahigayon ang face-to-face celebration sa Kadayawan Festival human ang duha ka tuig.
Gumikan niini, lauman nga mas daghan pa ang mutambong nga mga bisita.
Gawas niini, gipanaad usab sa opisyal nga mapabilin ang seguridad ug kaluwasan sa panglawas atol sa selebrasyon ilabi na nga anaa pa gihapon ang bahad sa COVID-19.
Nanghinaut na lamang ang konsehal nga magpabilin usab ang ubos nga ihap sa kaso sa COVID aron mamintina ang ubos nga level sa alert classification sa dakbayan.
Via || Hana Rallos
