DAVAO CITY – Mukabat sa napulo ka balay og lima ka establisyemento ang naugdaw samtang laing lima sab ang partially damage.
Anaa usab sa dul-an 20 ka pamilya nga naga-renta lamang ang apektado sa nahitabong sunog sa crossing Ulas Bgry. Talomo ning dakbayan kaganihang alas 5:56 sa buntag.
Sa eksklusibong pakighinabi sa Bombo Radyo Davao kang Maria Narcisa Cajes – Lu, trabahante sa usa ka establisyemento, pasado alas 5:56 sa buntag dihang nakadungog siya og kusog nga buto. Nagtuo kini nga dunay nadisgrasya sa dalan apan sa iyang paglingi, nagkalayo na ang ikaduhang andana sa laundry shop hinungdan nga iyang gipangpukaw ang iyang kaila nga tag iya sa ukay-ukayan.
Ang pahayag ni Maria Narcisa Cajes – Lu, trabahante sa usa ka establisyemento. Samtang sa pikas bahin, gikanayon ni FO3 Nicanor Hernandez Jr., fire investigator, nga pasado 7:20 kaganinang buntag sa dihang na kontrola ang sunog.
Padayon pa sab ang ginahimong imbestigasyon sa Bureau of Fire Protection aron masayran ang hinungdan sa maong sunog. Hinuon walay natalang namatay o naangol sa maong panghitabo apan wala gyud halos nabitbit nga gamit ang mga biktima.
By Bombo Allianne Silao
