DAVAO CITY – Gianunsyo na ang mga midaog sa gipahigayong Destination Davao Videomaking Contest karung tuig ilawom sa temang “New Normal in the City.”
Nadag-an ang first place sa “Ang Bag-ong Kasadya” sa Rad Visuals. Gipakita sa entry ang mga mag-amigo nga nidayo sa Davao aron bisitahon ang mga nag-unang mga talan-awon sa syudad samtang ginapatuman niini ang minimun public health standards.
Gidayeg sa usa ka mga hurado ang entry tungod sa maanindot nga aesthetics ug teknikal nga pag-gama sa video. Gilangkuban sab sa video ang luwas ug makalingaw nga pagbisita ug pagpuyo dinhi sa Davao ug ginahatagan sab ug pagtagad ang kasaysayan sa syudad ug ang kakusog niini isip tourist and investment destination.
Nadag-an sa first placer ang premyong P30,000. Nasa ikaduhang pwesto ang entry sa Friends into Film nga “Sugakod Ta” nga mahitungod sa nahimong kinabuhi sa Davao kaniadtong wala pay pandemya ug ang pagkahibalik niini sa tabang sa mga Dabawenyo ug mga turista nga nagasunod sa public safety protocols.
Samtang third placer ug People’s Choice Awardee pinaagi sa pagbotar sa social media ang entry sa D. Visuals x The Castle nga “Lakad” mahitungod sa usa ka tawo nga nagduha-duha pa sa pagbisita sa dakbayan apan nakahigayon nga masuruyan ang mga nag-unang destinasyon.
Nadag-an sa 2nd ug 3rd placers ang P15,000 ug P10,000 samtang aduna sab mga consolation winners nga nakadaug ug P5,000 kada entry.
Nahitabo ang contest niadtong Mayo 1 hangtud 31 ug giextend kini hangtud Hunyo 17 karung tuig. Ang Destination Davao Videomaking Contest, usa ka tinuig nga indigay sa mga video creators sa dakbayan nga giorganisa sa Davao City Information Office.
By Bombo LJ Florendo
