DAVAO CITY – Mamahimo nang magamit ang Safe Davao QR code isip automated teller machine (ATM) card aron maka-withdraw ang mga senior citizens sa ilang mga ayuda gikan sa lokal nga kagamhanan sa dakbayan sa Dabaw.
Gikanayon ni Pastor Luis Moran, ang hepe sa Office of the Senior Citizen affairs, nga tulo ka mga ahensiya sa lokal nga kagamhanan ang nagtinabangay karon.
Dugang pa ni Moran nga subling i-validate sa CSWDO ang listahan alang sa mga senior citizens.
Kalakip sa cash provision nga mamahimong madawat pinaagi sa SD QR ang annual cash incentive alang sa senior citizens nga ginahatag sa lokal nga kagamhanan lakip na ang cash grant gikan sa Department of Social Welfare and Development Office alang sa mga senior citizens.
Kahinumduman nga giaprubahan sa 19th Council sa dakbayan sa Dabaw niadtong May 19, 2022 ang amendment sa Ordinance No. 0105-19 nga nagmando sa tinuig nga paghatag sa P1,500 financial incentives ngadto sa mga senior citizens nga nag-edad ug 65 anyos pataas.
Sumala pa ni Moran nga kinatibuk-ang 125,344 senior citizens – 65 anyos pataas ang na-validate na ug makadawat og Php 1,500 matag usa.
Via || Angie Chagas
