DAVAO CITY – Gibutyag sa LTFRB 11 nga wala pa silay nadawat nga unsa mang aplikasyon alang sa pagpa-usbaw sa plitihan sa mga pampublikong sakyanan.
Kini bisan pa man ug giaprubahan na ang piso sa provisional fare hike sa mga PUV sa metro manila Region 3 o central Luzon ug Region 4 sa CALABARZON.
Gikan 9 pesos nga minimum fare alang sa unang 4 ka kilometro mahimo na kining 10 pesos karong panahona. Alang sa mga PUJ drivers sa Davao city, panahon na usab aron mangayo sila ug usbaw sa plitihan gumikan na usab sa padayon nga pagsaka sa presyo sa mga produktong lana sa nasud.
Giangkon sa mga PUJ drivers nga sukad niadtong adlaw nga martes migamay na ang ilang kita sa matag adlaw human misaka ug halos says pesos ang matag litro sa gasolina.
Ang piso nga usbaw sa plitihan dakong tabang na sumala pa aron aduna pay mahabilin sa ilang kiita alang sa ilang pamilya.
Apan, supak niini ang pipila ka mga pasahero sanglit dugang na usab nila kining palas-anon ilabi na niadtong mga mogasto ug dako sa ilang plitihan matag adlaw.
Gikanayon ni LTFRB 11 Regional director Atty Nonito Llanos III, abri ang ilang buhatan sa unsa mang petisyon alang sa usbaw sa plitihan, apan moagi kini sa taas nga proseso sanglit daghan sumala pa sila ug angayan nga ikonsedera.
