Narekober sa bag sa usa ka Grade 9 student ang usa ka pistola atol sa bag inspection sa Pinamungajan, Cebu, nga giingong gipanag-iya sa iyang lolo, sumala ni Philippine National Police o PNP Chief Jose Melencio Nartatez Jr.
Giverify pa sa mga otoridad ang tinuod nga tag-iya sa armas ug ang mga sirkumstansiya sa pagpanag-iya niini.
Sumala sa PNP, kung mapamatud-an ang pagpanag-iya, ipatuman ang angay nga legal nga aksyon subay sa kasamtangang balaod.
Nadiskubre ang armas sulod sa bag sa estudyante atol sa gihimong bag inspection, hinungdan nga gilayon kining gikordinar sa kapulisan.
Dugang pa niini, walay bala ang posil sa dihang narekober ug anaa na sa kustodiya sa kapulisan alang sa hustong disposisyon.
Gitugyan na usab ang menor de edad sa Municipal Social Welfare and Development Office alang sa angay nga interbensiyon, subay sa Republic Act No. 9344 o Juvenile Justice and Welfare Act.
Gipahimangnoan sa PNP ang mga ginikanan, guardian ug firearm custodian nga siguruhong luwas ug dili maabot sa mga bata o dili awtorisadong indibidwal ang ilang mga armas.
Gidasig usab sa kapulisan ang mga eskwelahan ug komunidad nga mokontak dayon sa mga otoridad kung adunay makitang hulga sa kaluwasan.
