DAVAO CITY – Sarado ang Philippine Eagle Center (PEC) karung adlawa, Abril 11 gumikan sa ipahigayon nga simulation activity arun nga makapangandam ang mga personahe niini alang sa possibleng ipatuman nga lockdown sa higayonm nga maasulod sa dakbayan ang Avian Influenza (AI) H5N1 o bird flu.
Sumala pa kang Andi Baldonado, development project manager sa Philippine Eagle Foundation (PEF), nga ang ipahigayon nga one-day drill nagtumong nga masulayan ang kaandam sa pasilidad sa higayon nga magbaton ug outbreak nga musangpot sa temporary closure sa center.
Salmutan ang maong drill sa mga bird keepers, food stock technicians, ug maintenance personnel arun nga epektibo nga mahuptan ang sitwasyon panahon sa lockdown alang sa kaluwasan sa giilang national bird, mga endemic raptors, ug uban pang mga hayop nga anaa karon sa PEC.
Una na sab nga gipahibalo sa PEF nga ang lockdown mamahimong grabe nga makaapekto sa operasyon sa center apan dili sab nila mamahimong ibutang sa risgo ang kaluwasan sa mga endemic wildlife diin kadaghanan niini ang ilang na-rescue nga kinahanglan ug temporaryo nga kapuy-an ug kinahanglan nga ipailalom una sa pag-rehabilitate. Hinuon subli nga mangabli ang Center ugmang adlawa.
