DAVAO CITY – Human ang gihimong pagsaway sa dakbayan sa Davao ug gitawag nga “drug center,” giila karon sa regional party ni Mayor Sara Duterte si vice presidential bet Walden Bello isip “narco-politician” gumikan sa mga alegasyon niini nga adunay illegal drug trade dinhi sa siyudad.
Una ng gibutyag sa Hugpong ng Pagbabago (HNP) nga makaalarma ang pahayag ni Bello hinungdan nga nanawagan ang grupo sa otoridad nga imbestigahan si Bello arun nga masayran kung aduna kini “knowledge and involvement” sa iyang mga nahimong pasangil.
Kahinumduman nga sa gipahigayon nga debate sa Comelec sa milabay nga Domingo, gikanayon sa magbabalaud nga “drug center of the South” ang Davao ilalom sa pagkontrola sa usa ka miyembro sa pamilyang Duterte.
Apan sa nahimong pahayag sa magbabalaud, gikataw-an lamang niini ang HNP sa pagtawag kaniya ug ‘narcopolitician’ ug gibarugan nga wala kini nalambigit sa bisan unsa man nga drug trade.
Gipanghimakak sab niini ang pasangil nga mibalibad siya sa paghatag ug impormasyon ug wala nakiglambigit ngadto sa otoridad inay wala matud pay ahensiya sa gobyerno nga miduol kaniya arun nga mangutana kalabot sa iyang mga nahimong pahayag.
Kahinumduman nga nagpagula sab kagahapong adlawa ug resolusyon ang City Council nga nagdeklara kang Bello isip Persona non grata sa dakbayan apan gikanayon sa magbabalaod nga dili kini makaapekto ngadto kaniya.
