DAVAO CITY – Ipadayon pa karung adlawa ang pagpangita sa mga nahibilin pa nga mga indibidwal nga una ng natabunan sa nahitabong landslide sa Diat Palo Pantukan Davao de Oro.
Una ng gibutyag ni Kent Simeon, sa Municipal Disaster Risk Reduction and Management Council (MDRRMC) sa Pantukan nga lisud ang pagsulod sa nahisgutan nga dapit sanglit gawas nga suok ang lugar, labihan sab kini kalapok.
Gani mano-mano sumala pa ang pagkubkub sa midahili nga yuta hinungdan nga posibleng dili gilayon makuha ang nahibilin pa nga lawas sa mga natabunan.
Kagahapong adlawa, narekober na ang usa sa upat ka mga indibidwal diin naila kini nga Gilbert Esto, anaa sa 40 anyos ang pangidarun ug residente sa Mati City.
Sagad sumala pa sa mga biktima ang dayo lamang sa lugar. Gitataw sab sa opisyal nga ayha pa nahitabo ang insidente, nagapahinumdom na sila sa mga residente nga nanimuyo sa mga lugar nga delikado sa pagdahili nga mag-igmat ilabi na nga pipila ka adlaw sab nga nakasinate ug grabe nga pag-ulan ang lalawigan sa milabay nga adlaw.
Gikanayong problemado sab karon ang MDRRMC sa ilang ginapahigayon nga retrieval operation gumikan pa gihapon sa daut nga kahimtang sa panahon ug lisud sab nga makasulod sa lugar ang mga gikinahanglan nga ekipo aron nga mapadali ang pagkubkob sa nalubong nga mga biktima.
Mihatag ug katin-awan si Simeon nga walay nahagsa nga tunnel inay pagdahili sa yuta ang nahitabo diin ang mga biktima anaa sa ilang bunkhouse dihang nahitabo ang insidente.
Ang pag-ulan sa lugar tungod sa nasinatian nga Low Pressure Area (LPA) sa ilang area sa Mindanao.
