DAVAO CITY – Naglaum karon ang lokal nga kagamhanan sa Mati City ngadto sa mga naninda ug karne sa lalawigan nga unta paubsan na ang presyo sa mga gipangtinda nga karne human nga mi-angkat na sila ug dugang supply niini.
Kahinumduman nga ilang gibasol ang kaso sa African Swine Fever (ASF) nga natala sa lugar nga maoy hinungdan nganong kulang ang suppy sa karneng baboy. Laraw sumala pa sa ilang pag-angkat ug baboy nga matubag ang panginahanglanon sa mga konsumante ug mapaubos ang presyo niini sa merkado.
Mikabat sa 75 ka mga buhing baboy ang gi-angkat karon sa lalawigan sa Mati diin gitagbo pa kini sa pipila ka opisyal sa lugar ingon man ni City Veterenarian Dr. Marites Linsag-Erispe ug Mati Slaughterhouse officer-in-charge Virgilio Dacillo Jr.
Prayoridad sumala pa sa lokal nga kagamhanan ang food security sa lugar hinungdan nga mihangyo sila karon sa uban nga farms arun nga ma-stabilize ang presyo niini.
Nasayran nga ang karneng baboy sa merkado ang anaa sa P340 hangtud P360 matag kilo ug plano nga mapaubsan kini ug P20 matag kilo.
Ayha sumala pa nag-angkat ug baboy ang lalawigan, gisiguro nila nga wala kini ASF ilabi na nga hugtanon nga ginapahigayon ang inspeksiyon sa lugar sukad nga nakatala sila niini sa milabay nga mga katuigan.
