DAVAO CITY – Bisan nga walay natala nga mga dagkong panghitabo sa Davao region matag panahon nga nagsingabot na ang eleksiyon, gikanayon sa Police Regional Office – 11 (PRO-11) nga aduna pa gihapon silay gi-andam nga security plan sa pinili-ay.
Sumala pa kang Major Eudisan Gultiano, PRO-11, nga wala silay natalang mga dagkong panghitabo sa Davao region ug gani malinawon sab sumala pa ang milabay nga mga eleksiyon sa rehiyon.
Magpakatag sab sumala pa sila ug mga sakop sa kapulisan sa tanan nga mga areas kalakip na sa mga giilang election watchlist areas.
Partikular nila nga tutukan karon ang mga lugar nga anaa sa listahan nga gilangkuban sa duruha ka siyudad ug 16 ka mga lungsod sa rehiyon.
Ang nahisgutan nga mga dapit aduna matud pay history sa election-related incidents, krimen ug presensiya sa armed groups. Kahinumduman nga kalakip sa mga listahan ang gilangkuban sa Bansalan, Digos City, Kiblawan, Matanao, Magsaysay ug Sta. Cruz sa Davao del Sur; Tagum, New Corella ug Talaingod sa Davao del Norte; Jose Abad Santos sa Davao Occidental; Lupon sa Davao Oriental; kalakip sab niini ang Laak, Mabini, Maco, Maragusan, Mawab, Monkayo, New Bataan, Pantukan ug Montevista sa Davao de Oro.
