DAVAO – Gikanayon ni Davao City Mayor Inday Sara Duterte-Carpio nga ang surge sa coronavirus disease (COVID-19) cases sa dakbayan gumikan sa highly transmissible Omicron variant ang lauman nga molungtad hangtud sa tunga-tunga nga bahin sa bulan sa Marso niining kasamtangan nga tuig.
Gikanayong anaa na karon sa ikaduhang semana ang COVID-19 surge ug laoman nga musaka pa kini sa umaabot pa nga mga adlaw tungod sa Omicron, nga giilang pinakapaspas nga mukatag nga variant sa SARS-CoV-2, nga hinungdan sa COVID-19.
Sa kasamtangan, nagpadayon ang lokal nga kagamhanan sa pagpatuman sa Prevention, Detection, Isolation, Treatment ug Rehabilitation o PDITR strategy alang sa COVID-19.
Subli nga gipahimangnoan niini ang publiko nga mag-doble amping sa higayon nga mugawas ug mahinungdanon ang kanunay nga pagsuot ug facemask bisan nga anaa sulod sa panimalay.
Dungan sa pagsaka sa kaso sa covid-19 pag-okupa karon sa health care facilities sa siyudad, gi-aprubahan na karon sa lokal nga kagamhanan ang home isolation, apan gitino niini nga alang lamang kini sa mga pasyente nga walay banyo sa ilang lawak.
Nasayran nga dinhi sa siyudad ang kapasidad ang anaa lamang sa 2,606 beds alang sa isolation ug quarantine.
Hinuon andam sumala pa ang lokal nga kagamhanan nga muhatag ug suporta sa mga private hospitals sa higayon nga musaka sab ang mga ma-admit tungod sa kaso sa Covid-19.
Sa kasamtangan, nakatala matud pa ang siyudad ug 822 panimalay, usa ka gambalay ug usa ka compound nga gipailalom sa hard lockdown gumikan sa transmission sa virus.
Una na sab nga gibutyag ni Mayor Inday nga nagpabilin sab karon nga hagit sa siyudad ang Testing sanglit nagpabilin kini nga limitado ingon man ang contact tracing gumikan kay adunay pipila ka mga indibidwal nga dili mosulti ug tinuod.
