DAVAO CITY – Lig-on ang nahimong basehan sa Mines and Geosciences Bureau nganong nagpagula sila ug hinanali nga kamandoan nag ihunong sa operasyon sa usa ka mining company nga maoy hinungdan sa bag-ohay nga siltation incident sa Pintatagan River ug Maputi River sakop sa munisipalidad sa Banaybanay, Davao Oriental.
Kahinumduman nga gimandoan gilayon ni Governor Nelson Dayanghirang ang MGB, nga ipatuman gilayon ang pagpa-undang sa operasyon sa minahan aron nga mapugngan ang grabe nga kadaut nga posibleng ihatud niini sa kasapaan sa lugar.
Kahinumduman nga nasinatian ang grabe nga siltation sa lugar human ang grabe nga pag-ulan sa nahisgutan nga dapit sa milabay nga adlaw nga gikatingala sa mga residente nga nanimuyo duol sa sapa.
Gipasalig karon sa ahensiya nga dili nila pabalikon sa operasyon ang nahisgutan nga kompanya sa higayon nga dili nila mahatagan ug tukma nga solusyon ang suliran uu mamahimong pahamtangan nila kini ug sanctions.
Una na matud pa nga gibutyag sa mining company nga sa kasamtangan, mihimo na sila ug lakang arun nga makontrola ang water discoloration ug siltation ug palambuon pa ang ilang environmental mitigating measures.
Bisan tuod nga dakong tabang ang mining companies sa pag-generate ug income sa lalawigan, paghatag ug panginabuhian sa mga residente ug makatabang sa pag-recover sa ekonomiya, gibarugan sa provincial ug national government nga dili pa gihapon nila kini tugtan sa higayon nga magpadayon ang pagpasagad sa ilang operasyon nga maoy hinungdan sa pagdaut sa kinaiyahan.
