DAVAO CITY – Gibutyag sa Department of Health Davao Region nga ang Delta variant sa SARS-CoV-2 nga hinungdan sa COVID-19 ang dominanteng variant of concern sa rehiyon.
Subay sa ilang ulahing datos, anaa sa 433 ang Delta variant cases sa Region XI, ug gisundan kini sa Beta variant nga dunay 333 cases ug Alpha variant nga dunay 148 variant.
Dugang pa sa labaw sa DOH-DCHD nga si Dr. Rachel Pasion, wala pa sila natala nga Omicron cases dinhi sa Davao Region, apan padayon ang ilang detection measures alang sa posibleng presensya sa Omicron variant sa rehiyon.
Padayon usab nga ginabantayan sa DOH XI ang uptrend sa mga kaso karon sa Region XI.
Kagahapon, nakatala ang Rehiyon Onse og dugang 107 new cases, hinungdan nga misaka ngadto sa 662 ang aktibong kaso karon sa rehiyon.
Sa mga bag-ong kaso, 74 ang gikan sa Davao City; 10 sa Davao de Oro; 13 sa Davao del Norte; 1 sa Davao del Sur; ug 9 sa Davao Oriental. Wala usab natalang recoveries kagahapon samtang duha ang late-reported deaths gikan Davao de Oro.
Anaa na sa 105,067 ang total confirmed cases sa COVID-19 sa Davao Region.
