DAVAO CITY – Hangtud Enero 15 na lamang karung 2022 mamahimong i-donar sa mga residente sa siyudad ang ilang food packs ngadto sa mga nabiktima sa Bagyong Odette.
Kabahin pa gihapon kini sa option sa mga dabawenyo kung i-claim o i-donar na lamang nila ang ilang pahalipay.
Kahinumduman nga ubay-ubay nga mga dabawenyo ang naka-desisyon nga idonar na lamang nila ang ilang pahalipay pipila ka adlaw ayha ang kapaskohan human nga daghanan mga residente sa pipila ka mga lugar sa Mindanao ug Visayas ang nawad-an ug supply sa pagkaon human nga mikuso-kuso ang bagyo.
Una ng gipatuman ang maong pamaagi sa pagpang-apud-apod ug hinabang aron nga ma-kontrola ang lihok sa mga tawo ug mapaubsan ang pagkatag sa COVID-19 virus.
Gawas sa donasyon sa lokal nga kagamhanan, migahin sab ang LGU ug financial assistance sa mga areas nga grabeng naapektohan sa Bagyo.
Ilalom sa aid package, ang mga apektadong probinsiya makaangkon ug P1 million, samtang ang mga siyudad ganihanan ug tig-P500,000 ug P300,000 sa mga lungsod.
Dali sab mahatagan ug tabang ang usa ka lugar sa higayon nga dili kini mapailalom sa state of calamity.
