DAVAO CITY – Hangtud karon, halos dili lamang gihapon makatuo si Quinnie Nifcille Cortal Dalnay nga nahilakip siya sa listahan sa top 10 sa mga nakapasar sa Licensure Examination for Teachers (LET) Secondary Level nga gipahigayon niadto lamang bulan sa Setyembre niining tuig kasamtangan.
Sa pakighinabi sa Bombo radyo Davao, gikanayon ni Dalnay kinsa graduate University of Mindanao-Davao city ug usa sa mga nabutang sa ika-napulo nga pwesto sa listahan diin adunay rating nga 91.20, nga dili siya makatuo nga makasulod siya sa top ten examinees.
Apan giangkon niini nga nakasinati usab siya ug kalisdanan atol sa gihimong pag-review gumikan kay pinaagi lamang kini sa online.
Alang kaniya dako kaayo ang kalainan sa face to face nga pag-review sa mga review centers gumikan kay mas daghan ug makat-unan ug mas maka-concentrate kung itandi sa balay lamang nga mas samok ug saba ang palibot.
Hinuon, wala gihapon makawang ang iyang mga paningkamot gumikan kay natuman gayud ang iyang pangandoy nga mahinong usaka hingpit nga magtutudlo.
Gawas kaniya, dili usab sumala pa masukod ang kalipay sa iyang mga ginikanan lakip na usab ang iyang Lolo nga unang nakakita sa iyang pangalan nga napatik sa listahan sa mga top notchers.
Samtang, silang tanan sumala pa nga 60 ka mga nagkuha ug major ang nakapasar sa exam diin 4 kanila apil na siya ang naa sa top list.
