DAVAO CITY – Gibutyag ni Atty. Christine Balog-ang, residente sa Baguio City ug kasamtangang nanarbaho sa Khortoum Sudan nga wala pa silay nailhan nga pinoy nga nasakitan ug napagan sa nahitabong kagubot karon sa Sudan tali sa mga protesters ug mga sakop sa militar nga misakop karon sa ilang gobyerno.
Gikanayong dili lamang kini ang unang higayon nga adunay nanag-protesta sa kadalanan sa Sudan gumikan kay kaniadtong tuig 2019 miulbo sab ang kagubot sa lugar.
Subay sa kasaysayan sa Sudan, 30 ka tuig na matud pa sila nga napailalom sa pagdumala sa militar. Gumikan kay buot na nga makaangkon ug kagawasan sa mga residente sa nahisgutan nga lugar, nagapahigayon na lamang sila ug mga lihok protesta.
Hinuon usa sa mga lakang nga gihimo karon sa mga pinoy mao ang paglikay sa mga lugar nga adunay matalang kagubot aron nga dili sila mapagan.
Sa kasamtangan, wala pa silay plano nga mopauli dinhi sa nasud ug maniid lamang una sila sa mamahimong dagan sa sitwasyon sa lugar.
Pahayag ni Atty. Christine Balog-ang, residente sa Baguio City ug kasamtangang nanarbaho sa Khortoum Sudan. Samtang gikanayon sab ni Karen Mae Medalla, lumad nga taga Cagayan de Oro ug anaa sab karon sa Khartoum Sudan, sukad kaniadtong Lunes, wala na matud pa sila migawas sa ilang pinuy-anan kini aron nga dili sila mapagan sa kagubot.
Gisiguro sab nila nga aduna silay igong supply sa pagkaon samtang anaa sa ilang mga pinuy-anan.
Gikanayon ni Karen nga dili lamang kini ang unang higayon nga nakasinate ug kagubot ang lugar hinungdan nga nakapangandam na sila gawas pa sa gipagulang advisory sa embahada sa Pilipinas sa mga mamumuong pinoy nga anaa sa nahisgutan nga nasod.
