DAVAO CITY – Magsugod na karong Biyernes, Oktubre 29, ang COVID-19 vaccination rollout alang sa mga anaa sa Pediatric A3 Priority Group kon mga batang 12-17 anyos nga dunay mga balatian.
Ipahigayon kini sa mga pili nga balay-tambalanan sa Dakbayan sa Davao nga gilangkuban sa Southern Philippines Medical Center, Metro Davao Medical and Research Center, ug Seamen’s Hospital.
Sugdan usab kini sa uban pang mga ospital sa Davao Region nga gilangkuban sa Davao del Sur Provincial Hospital, Davao Regional Medical Center, Davao de Oro Provincial Hospital, ug Davao Oriental Provincial Hospital.
Gamiton alang sa pagpabakuna ang Pfizer-BioNTech ug Moderna vaccines tungod nakabaton na ang mga naasoy nga bakuna og Emergency Use Authorization gikan sa Food and Drug Administration alang sa mga batang dunay comorbidities.
Kinahanglan ipa-schedule sa mga ginikanan ang ilang mga anak sa mga accredited hospitals nga pahigayunan sa vaccination.
Atol sa schedule, kinahanglan usab nga dal-on sa mga ginikanan ang medical certificate sa ilang mga anak, valid IDs sa mga anak ug ginikanan o di kaha guardian, o di kaha birth certificate.
Kinahanglan usab ubanan ug giyahan sa mga hamtong ang ilang mga bata sa adlaw mismo sa pagpabakuna.
