DAVAO CITY – Dili usa ipatuman sa Davao City LGU ang pagpakita og vaccination cards inig musulod sa mga establisamento, ilabi na sa mga kan-anan.
Gipadayag ni Mayor Sara Duterte ang kabalaka nga basin mameke og mga vaccination card ang mga tawo aron makalusot lang sa maong rekisitos.
Dugang niya, dali ra usab makopya ang kasamtangang ginagamit nga vaccination cards, ug kung ipatuman dayon ang vaccination card requirement, mapugos ang pipila nga buhaton ang mga iligal nga pamaagi aron lang makakuha niini.
Giklaro usab sa Alkalde nga dili magamit ang nasangpit nga card alang sa pagberipika sa vaccination status, ug dili usab sala sa publiko nganong wala pay online vaccine database ang Dakbayan.
Sa kasamtangan, adunay kapin 200,000 ka mga discrepancy sa mga datos gikan sa vaccination cluster nga ginasumite usab sa VaxCertPH.
Samtang ginaayo pa ang mga datos, dili usa ipa-require sa mga establisamento ang vaccination record sa ilang mga customer.
