DAVAO CITY – Hitsas na ang pagpangandam sa mga sakop sa kapulisan sa Police Regional Office (PRO)-11 aron nga bantayan ang mga sementeryo sanglit laoman ang pag-adto sa mga tawo human nga pasirad-an kini sa sugod Oktubre 24 hangtud na sa Nobyembre 7, 2021.
Sumala pa kang Pol. Capt. Rose Aguilar, tigpamaba sa Police Regional Office (PRO)-11 nga karon pa lang gihan-ay na nila ang deployment sa ilang mga sakop ilabi na nga laomang mas sayo nga moadto karon sa mga sementeryo ang katawhan aron nga duawon ang ilang mga minahal sa kinabuhi nga mipanaw na.
Gikanayon ni Aguilar nga kinahanglan sab nga bantayan ang mga mosulod sa mga sementeryo aron nga dili makalusot ang mga butang nga hugtanong gidili sama na lamang sa baraha, alak, stereo ug daghanan pa.
Nagpahimangno sab ang kapulisan sa publiko nga nagpabilin pa ang bahad sa covid-19 hinungdan nga kinahanglan mo-obserba pa gihapon sa minimum health standards ug likayan ang mass gatherings o pagtapok-tapok.
Pabilin sab sumala pa nga magsuot ug facemask sa higayon nga moadto sa mga sam-ang ug pabilin nga ipatuman ang social distancing.
