DAVAO CITY – Nahurot na dayon ang gipanghatag nga priority numbers sa Commission on Elections Davao City Field Office ngadto sa mga rehistrante pasado alas 8 sa buntag kagahapon.
Gani, ang laing hugna sa pagpanghatag sa priority numbers nagsugod alas 7 kagabii sa gawas sa Magsaysay Park, isip lakang aron mapugngan ang pagdasok sa mga rehistrante, nga nakasupak na usab sa health protocols.
Nagpabilin gihapon sa 500 registrants matag adlaw ang ilang maakomodar.
Padayon usab ang pagbantay sa kapulisan sa palibot sa buhatan aron mamintinar ang physical distancing sa mga buot magparehistro alang sa 2022 National and Local Elections.
Matag weekdays ra usab abli ang buhatan sugod alas 8 sa buntag hangtod alas 5 sa hapon, alang sa gilugwayan nang voter’s registration.
Sa Oktubre 30 na ang deadline sa pagparehistro, ug dili na kini lugwayan pa og usab.
Busa, nanawagan ang COMELEC-Davao City ngadto sa publiko nga dili na hulaton ang deadline aron dili na masubli ang taas nga pila nga miawas na padulong sa Sta. Ana Wharf ug sa Fruit Stand gawas sa Magsaysay Park niadtong pipila ka adlaw ayha ang orihinal nga September 30 deadline.
