DAVAO CITY – Nagapadayon gihapon ang pagtukod sa Davao City Coastal Road, diin aduna nay pipila ka bahin niini ang nahuman na samtang pahumanay na usab ang ubay-ubay ka mga atraksyon sa Coastal Road, sama na lang sa Bago Aplaya Esplanade.
Gikatakda usab nga mamahimo kining bag-ong suruyanan sa mga Dabawenyo sa higayong mahuman na kini.
Sa pikas bahin, tumong nga mahuman sa Department of Public Works and Highways ang 18.5km nga Coastal Road sa sunod tuig.
Ang proyekto, nabahin sa tulo ka segment, nga nagsugod sa Bago Aplaya, nga muagi sa Times Beach hangtod na sa maabot sa R. Castillo, Agdao.
Ang nasangpit nga proyekto, gimugna isip tubag sa padayong pagkahuot sa dagan sa trapiko sa Dakbayan.
Tumong usab niini nga pamub-on ang travel time sa mga biyahero nga mupaingon sa Norte o di kaha sa South nga bahin sa Dakbayan.
Sa karon, dili pa abli sa publiko alang sa pag-exercise, pagbisikleta, o di kaha sa recreational activities ang mga nahuman nang bahin sa Coastal Road.
