DAVAO CITY – Namerwisyo ang Tropical Storm MARING ug kanhi-Tropical Depression nga NANDO sa pipila ka bahin sa Davao City ug Davao del Sur niadtong weekend.
Ang kakusog sa hangin nga dala sa duha ka daut sa panahon ang mitumpag sa usa ka balay sa Purok 10, Baracayo, Daliaon Plantation sa Toril District.
Daghang mga punuan usab sa saging ang nangatumba ug dili na mahimuslan pa, ug hapit usab nga matumbahan ang usa pa ka laing panimalay sa usa dakong punuan sa kahoy.
Walay nangaangol sa nasangpit nga insidente. Samtang, napalid ang usa ka sin sa kable sa kuryente sa Sitio Mainit, Barangay Kapatagan, Dakbayan sa Digos.
Hinuon, walay naigo sa pagkalupad sa sin nga gikan pa sa usa ka panimalay. Nawad-an sab og kuryente ang pipila ka bahin sa Sitio Neptune, Barangay Managa, lungsod sa Bansalan.
Gi-ayo usab sa DASURECO ang linya, hinungdan nga nibalik ra usab ang linya sa kuryente sa wala madugay.
