DAVAO CITY – Gi-anunsyo sa lokal nga panggamhanan sa Sarangani, Davao Occidental nga aduna nay kaso sa African Swine Fever sa ilang munisipyo.
Kalabot niini, gilayong nagpagula og Executive Order Number 26 series of 2021 ang Sarangani LGU nga istriktong nagabawal sa pagpasulog, pagpagawas, pagbiyahe, ug pagpamaligya sa mga buhing baboy, karneng baboy, ug mga produkto gikan sa karne sa baboy sama sa tocino, chorizo, ug uban pa.
Subay sa ilang gihimong pagsusi sa mga buhing baboy sa nasangpit nga lungsod, nasayran nga naggikan sa Barangay Tical sa Balut Island ang sample nga nagpositibo sa ASF nga gikuha niadtong Setyembre 17 ning kasamtangang tuig.
Busa, gimando sa alkalde sa lungsod nga si Virginia Cawa ang tanang nanag-iya og mga babuyan nga ug galing adunay namatikdan nga sintomas sa ASF sama sa pagluya o di kaha pagkasakit sa mga baboy, kinahanglan nilang ireport gilayon kini sa ilang Municipal Agricultural Office.
Ayha pa man ang kompirmasyon sa pagsulod sa ASF sa Sarangani Island, dugay nang nahimong suliran sa uban pang dapit sa Davao Region ang nasangpit nga sakit nga nakaapekto sa pork industry ug revenue sa rehiyon sukad sa pagkaylap niini niadtong unang bahin sa tuig 2020.
