DAVAO CITY – Gumikan sa kadaghan sa mga Dabawenyo nga nasayran sa lokal nga panggamhanan nga gapamili og bakuna, gibutyag ni Davao City Mayor Inday Sara Duterte-Carpio nga nagpagula na og resolusyon ang Davao City COVID-19 Vaccine Cluster ngadto sa Inter-Agency Task Force kon IATF nga nagahangyo nga ihunong usa ang pagpalit ug pag-deliver sa mga bakunang Sinovac ug Sinopharm ngadto sa mga vaccination site sa Dakbayan tungod sa baba nga preference niini.
Inay mga Chinese-made vaccines, mga bakuna sa Pfizer BioNTech ug Moderna ang ipangpalit ug ipadala nganhi sa Dakbayan sanglit taas ang interes niini sa mga buot magpabakuna.
Kahinumduman nga sa milabayng semana, subling nag-awhag si Duterte-Carpio ug si COVID-19 Task Force Spokesperson Dr. Michelle Schlosser nga dili na mamili og bakuna, ug kinahanglan usab nilang huna-hunaon ang ilang isig-katawo sa pagpabakuna batok COVID-19.
Gani, gi-anunsyo sab niadtong milabayng semana ni Duterte-Carpio ang mga nangatapdan sa nasangpit nga virus nga gigrupo subay sa brand.
Didto usab nasayran nga naglangkob niini ang tanang brands sa COVID-19 vaccine.
Busa, walay nay rason pa ang mga Dabawenyo nga mamili og brand sa bakuna.
