DAVAO CITY – Palig-unon pa sa Task Force Davao ang seguridad dinhi sa Dakbayan pinaagi sa pagpakusog pa sa ilang checkpoint operations.
Mao kini ang nahisgutan sa TF Davao ug sa security clusters atol sa ilang emergency meeting.
Kanunay usab ang pakig-alayon sa TF Davao ngadto sa mga nagkadaiyang unit sa Armed Forces of the Philippines, ilabi na sa Intelligence Unit, ug sa Davao City Police Office, sumala sa hepe sa TF Davao nga si Colonel Darren Comia.
Wala pa usab sila nakadawat og taho kalabot sa posibleng terror attack sa Pilipinas ug sa lima pa ka nasud sa Southeast Asia, nga gibutyag una sa Japanese Government.
Hinuon, gipasalig ni Comia nga kontrolado nila ang sitwasyon sa kasamtangan ug nagpadayon usab ang ilang hugot nga seguridad dinhi sa Dakbayan sa Davao.
