DAVAO CITY – Gibansay na sab karon sa lokal nga kagamhanan ang pribadong sektor aron nga mapalig-on pa ang ipahigayon nga contact tracing dinhi sa dakbayan ilabi na karon nga nagpadayon ang pagsaka sa kaso sa mga natakdan ug covid-19.
Pinaagi sa nahisgutan nga lakang, magbaton ug igong kaalam ang pribadong sektor kung paunsa sumala pa nila masubay ang mga indibidwal nga nakahimamat ang mga tawo nga nagpositibo sa kagaw.
Una ng gibutyag ni Davao City Covid-19 Task Force Spokesperson Dr. Michelle Schlosser nga gisugdan na nila karon ang maong lakang pinaagi sa pagpahigayon ug training sa mga private establishments aron nga mapadali ang pag-trace sa mga first-generation (F1) contact sa confirmed positive case; second-generation (F2) contact sa mga adunay close contact sa F1; ug third-generation (F3) contact sa mga adunay close contact sa F2.
Nasayran nga unang gibansay kadtong mga sakop sa commercial banks sa dakbayan nga sagad maoy dagsaon sa mga tawo ug taas ang kaso sa transmission sa kagaw.
Kahinumduman nga daghanan karon sa mga adunay contacts sa mga positive patients ang dili sab moadto sa mga swab centers o mopailalom sa swab tests.
Sa higayon nga makiglambigit ang mga pribadong sektor sa nahisgutan nga lakang, posibleng malikayan ang lockdowns sa mga concerned establishment sanglit sayud na sila kung si kinsa nga mga indibidwal ang kinahanglan nga ipailalom sa isolation. Gawas sa mga bangko, sagad sab sa mapailalom sa lockdown ang mga BPO companies.
