DAVAO CITY – Subling nagpasidaan ang Municipal Disaster Risk Reduction and Management Office sa lokal nga panggamhanan sa Mawab, Davao de Oro ngadto sa ilang gisakupan nga dili magpataka og labay sa ilang mga basura ngadto sa KM 65, National Highway, Barangay Salvacion sa nasangpit nga lungsod.
Matud pa sa Mawab LGU, masiplatan na lang nila nga nagkatag-katag ang mga basura sa kadalanan sa wala pa nila nailhing responsable.
Tungod niini, gawas sa kabaho, nakahatag kini og kamaot sa ilang kadalanan.
Gipahibalo usab nila nga kalapasan sa Republic Act 9003 kon Ecological Solid Waste Management Act, ang indiscriminate ug iresponsable nga pagpanglabay sa mga basura, ug posible silang mapahamtangan og kaso o di kaha mapriso tungod niini.
Nanghinaot ang Alkalde sa Mawab nga si Ruperto Gonzaga III nga maundang na sa hingpit ang susamang mga panghitabo aron na usab sa kahapsay ug kalimpyo sa ilang palibot sanglit ilang tumong nga mapreserba og mapabilin ang kalimpyo sa kinaiyahan.
