DAVAO CITY – Subay sa pagkumpirma sa Department of Health nga duna nay 516 ka bag-ong kaso sa COVID-19 Delta variant sa Pilipinas kagahapon, gikumpirma usab sa Island Garden City of Samal ang ilang labing unang Delta variant case nga usa ka babaye nga lumulupyo sa Barangay Peñaplata.
Recovered na ang nahisgutang kaso human sa mandatory 14-day Quarantine. Apan, kinahanglan kinig ipailalom sa reswabbing, uban na sab ang F1, F2, ug F3 contacts niini.
Sa pikas bahin, gikasubo ni Digos City Mayor Josef Cagas ang pagka-detect sa tulo ka Delta variant cases sa ilang Dakbayan.
Tungod niini, iyang giawhag ang mga Digoseño nga mutuman sa mga health protocol ug tabangan ang gobyerno sa pagpakgang sa pagtakod-takod sa COVID-19.
Gipahugtan na usab nila ang enforcement sa mga ordinansa kalabot sa nasangpit nga sakit.
Magpatuman usab og granular lockdowns sa mga barangay karong padayon usab nga nagasaka ang mga kaso sa nahisgutang kagaw sa ilang Dakbayan.
Ang upat ka mga dugang kaso, kabahin lang sa 22 ka mga bag-ong kaso sa Delta variant sa Davao Region kagahapong adlawa.
Sa kinatibuk-an, anaa na sa 1,789 ang kumpirmadong kaso sa Delta variant sa Pilipinas.
